نعمة حسين الحباشنة - معمول بالفستق الحلبي
معمول بالفستق الحلبي ...
هل هلال العيد بكرا أخر يوم في رمضان و الكل فرحان ؛ هاد عم يشتري بوط وهداك بيشتري شوكولاه والتالت عم بيقيس البدلة ومن الفرح صابه جنان ...
وأنا واقفة عالبلكون بسال حالي شو هالطابور عاباب الفران ؟ اي انتبهت !! هدول الشباب حاملين صواني المعمول ليخبزوهم عند الفران ؛ مين اللي واقفين عالبلكون قبالي ؟؟ هي ام احمد وام محمد وجارتهم ايمان ؛ عم بيطلوا ويراقبوا ايمتا بيوصل المعمول بلا ما يكبوه عالارض الصبيان ..
صواني مليانه معمول بالجوز ومعمول بالتمر ومعمول بالفستق الحلبي !!! بتعرفوه للفستق الحلبي و بتعرفوها لحلب ؟ حلب أخت حمص ودرعا والميدان ولا انساكم اياهم العيد وعطايا السلطان ؟
فستق حلبي أصيل مزروع عا اطراف قلعة حلب سقاه بعرقه ابوحمزه الفلاح وجمعت قطوفه ام حمزة الطيوبة ؛ كانت تساعدها لام حمزة بنت الجيران البنت تغني وأم حمزة تحكيلها : ما أحلى صوتك يا ميمتي ايمتا بدي شوفكم أنت وحمزة عرسان ارقص بعرسكن وأكايد النسوان ؟
أكيد اتزكرتوها لحلب هناك مطرح ما بتغني الحرية للمجد وبتتحدى أعوان الطغيان . ... قولكن بعدها هونيك الشجرة ؟؟ ولا حرقتها قذايف حليف الشيطان ؟؟؟
قولكن بعده بيحرث الأرض ابو حمزة ولا ذبحوه بالسكين يوم مانزلوا عالبلد عبدة الشيطان ؟؟ قولكن بعدها بتدعي لحمزة أم حمزة ولا طريدة مشردة بخيمة وسط الصحراء والغبرا عالحدود بتبكي غدر الزمان وظلم الاخوان ؟؟ قولكن تجوز حمزة بنت الجيران ولا بعده حامل سلاحة ليحمي عرضه وعرض بنات الجيران ؟
طيب وينها بنت الجيران بعدها بمدرستها بتنشد نشيد الحرية كل يوم ولا لقوها مقتوله بنص الحرشة بعد ما غتصبوها شلة الشبيحة والزعران ؟
معمول بالفستق الحلبي معجون بدم ودموع أهل حلب والشام بينادي عليكم ويقلكم كل عام وانتو بخير ياعرب وصحتين عاقلبكم أنا ... لكن ديروا بالكم تشرقوا بدمي ودموعي ويرميكم بالغدر مثل ما رماني الزمان ....
عمان / 18/8/2012 م
المشاركات
ليست هناك تعليقات:
إرسال تعليق